2021/02/04

Lazim Destani mbështet botimin e librit Demografia e Kosovës

Akademia e Shkencave dhe Arteve e Kosovës (AShAK) ka promovuar sot librin “Demografia e Kosovës” me autor, Akadmik Hivzi Islami. Shtypjen e kësaj vepre shkencore e financoi filantropi Lazim Destani.

Më 4 shkurt 2021, në sallën e Akademisë së Shkencave dhe Arteve të Kosovës në prani të Akademikëve, studiuesve dhe dashamirësve të librit u promovua libri i Akademikut Hivzi Islami “Demografia e Kosovës – Evolucioni i popullsisë, migrimet, gjeopolitikat ekspansioniste serbe dhe spastrimet etnike të shqiptarëve”.

Për vlerat që bart ky libër foli Sekretarja e Seksionit të Shkencave Shoqërore, Akademikja Justina Shiroka-Pula, recensentët e librit Akademik Isa Mustafa dhe Akademik Anton Berishaj, si dhe bashkëpunëtori shkencor i autorit të librit, prof. Arsim Ejupi. Ndërsa në emër të z. Lazim Destani këtë ceremoni promovuese e përshëndeti znj. Pranvera Kasami.

Folësit e vlerësuan lart librin duke e cilësuar si punë kolosale për zbardhjen, evidentimin, analizën, interpretimin dhe prezantimin e rezultateve në lidhje me gjendjen, trendet si dhe faktorët që kanë nxitur ndryshimet demografike në Kosovë.

Justina Shiroka-Pula tha se autori Hivzi Islami në librin “Demografia e Kosovës – Evolucioni i popullsisë, migrimet, gjeopolitikat ekspansioniste serbe dhe spastrimet etnike të shqiptarëve”, me qasje shkencore, moderne dhe profesionale ka sjellë risi në fushën e demografisë, ndërsa falënderoi filantropin Lazim Destani për financimin e librit.

Akademiku Anton Berishaj tha se autori ka bërë një punë të madhe në fushën e demografisë. “Autori i librit, Hivzi Islami, ka bërë një punë të madhe në zbardhjen, evidentimin, analizën, interpretimin dhe prezantimin e rrjedhave demografike që lidhen me gjendjen, trendet, ndryshimet, faktorët që i nxisin ato dhe perspektivën e rrjedhës së këtyre proceseve në Kosovë”, tha Berisha.

Në fjalën e tij, Akademiku Isa Mustafa tha, “E kam vlerësuar lart përmbajtjen, bazueshmërinë shkencore dhe historike, metodologjinë e përdorur dhe kronologjinë e konkludimeve të këtij botimi. Botimi ‘Demografia e Kosovës’, prezanton aspekte shumë dimensionale të studimit të popullsisë, ndërlidhur me ekonominë dhe zhvillimin duke trajtuar këtë edhe në rrafshin botërore, nga aspekti i qasjes së OKB-së por edhe nga aspekti i tranzicionit demografik në Evropë”.

Ndërsa Pranvera Kasami në fjalën e saj i përshëndeti të pranishmit në emër të z. Lazim Destani me ç’rast i solli vlerësimet e tij më të larta për këtë vepër shkencore. Ajo tha, “Më lejoni t’jua sjell të falat e përzemërta të z. Lazim Destani i cili përkundër dëshirës nuk e pati mundësinë të merrte pjesë në promovimin e këtij libri shumë të çmueshëm. Një vepër e këtillë nuk kishte si të mos çmohej lart edhe nga filantropët, dhe në këtë rast, nga z. Destani. Ne si mbështetës me padurim pritëm të dalë në dritë kjo vepër që do t’u shërbejë shumë gjeneratave, studentëve dhe studiuesve e hulumtuesve të fushave të ndryshme nga vendi dhe jashtë”.

Artikuj të ngjashëm
08.01.2021
Me rastin e përfundimit të punës prej më se 30 vjetësh në Kongresin Amerikan, Lazim Destani e ka çmuar lart...
22.12.2020
Dje, më 21 dhjetor, u mbajt takimi përmbyllës për vitin 2020 i Dhomës së Biznesit të Diasporës Shqiptare me ç’rast...
08.12.2020
Konferenca mjekësore ndërkombëtare multi-disiplinare, një bashkëpunim i Shoqatës së Mjekëve Shqiptarë në Gjermani me ACMS (Albanian Committee of Medical Students)...